SIBORONGBORONG.WAHANANEWS.CO, Hariara - Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Hehe ma Ho Marsinondang ma Ho." Rap ma hita mangihuthon hatoranganna.
Pendahuluan: -
Disurathon si Jesaya hata ni Debata na pinasahatna tu bangsoNa i, diombas naeng marujung nama ngoluna. Hata na gabe patoguhon, paposhon jala na mangonjar semangat nasida naung sanga maheu uju di habuangan i. Naeng lehononna sinondang na manondangi ngolu ni bangso i, ala sitaonon nasailaon i. Tung mangholom do panghilalaan nasida hinorhon ni parungkilon ni ngolu saleleng di habuangan i. Ndang tolap nasida be mangalangka, mandalani ngolu ala ni haholomon i. Ingkon adong nama sinondang na manondangi pardalanan nasida, asa marhite sinondang i, mangolu ma muse panghirimon nasida jala tarapul.
Baca Juga:
Perayaan Natal SD Negeri 173275 Hariara di Gelar di Gereja HKI Hariara Silaban
Gombaran haholomon ngolu ni jolma isarana panghilalaan mabiar, ala borat ni sitaonon, panghilalaan na sai mandele ala ndang adong be panghirimon i, ndang adong be panggorak ni roha uju mangulahon dosa, ndang maila be mangulahon dosa, mangasahon pingkiran nang rohana sandiri. Songon i ma parngoluan ni jolma na tarrante huaso ni portibi on. Lam mandao ngolu ni jolma sian dalan ni Debata. Songon na hea nialaman ni bangso Israel uju di habuangan Babel i, boi do tong masa di partingkian si saonari on. Tung godang do na mambahen holom ngolu ni jolma, di sude partingkian mulai sian na jolo sahat tu saonari sai adong be do hamaolon i.
Di Minggu Advent na paopathon on, naeng begeonta soara ni si Jesaya bagian na patoluhon on uju disaringarhon tu tongatonga ni bangso Israel, jala laos na naeng tapahusorhusor di rohanta ganup. Dimotivasi muse bangso i asa hehe sian ngolu na gale, maheu jala mandele nasailaon, jala asa marsinondang muse singkat ni ngolu na holom saleleng on.
Ala Debata sandiri nama na paulihon nasida sian hadadabu ni ngolu nasida.
Baca Juga:
Masyarakat Anggota Kelompok Tani Resah dan Kecewa Pendistribusian Pupuk Bersubsidi Di Taput Tidak Terserap Seutuhnya
Laos i do nuaeng gabe barita las ni roha di hita dipanomunomuonta di haroro ni Pesta Natal, parningotan ari hatutubu ni Sipalua i, Panondang na tutu na gabe hagogok ni na sinuriranghon ni angka Panurirang di Padan na Robi.
Pembahasan: -
Molo tapamanat bola lampu listrik di ganup bagasta, boi mangolu molo marsiainan bola lampu i tu bona ni arus listrik marhite kabel. I do gombaran sinondang ni jolma, boi marsinondang jolma i ala marsada, terhubung denggan tu bona ni sinondang i, i ma Tuhan i. Nunga diparhite Tuhan i panurirang Jesaya na gabe saluran asa denggan muse hubungan ni jolma i tu Debata. Asa boi mangolu sinondang i. I do na naeng janghonon ni bangso i.
Hubungan naung sanga putus, umbahen gabe tarbuang nasida, gabe dipauli Tuhan i muse gabe mulak denggan jolma i maradophon Debata.
Haheheon ni bangso Israel ala naung sahat panondang di tongatonga nasida, boi nasida dipalua Tuhan i sian habuangan Babel. Sinondang ni Tuhan i boi digombarhon songon mata ni ari na mullop ganup manogot. Sinondang na mangalehon panghirimon na imbaru. Uju sinondang ni Tuhan i marsinondang di ngolunta mangihutma hamuliaon. Na gabe patar marhite ngolu ni bangsoNa, angka na pormal dipillit Tuhan i bangso Israel ujui laos pahusorhon nasida sian linggoman ni haholomon tu sondang hatiuronNa. Suang songon i ma hita na tardok Kristen, naung manjanghon sondang ni Kristus i. Ibana do hagogok ni Sinondang naung dipasahat tu tongatonga ni bangso Israel uju i.
Diigil Tuhan i sian hita asa saleleng mangolu di portibi on, asa gabe panondang dohot pasupasu tu na humaliang hita. Diondolhon Tuhan Jesus do muse di JamitaNa di Mateus 5:4 paboa hita do panondang ni portibi on.
Sinondang na ro sian Tuhan i, naung manondangi hita, laos gabe manondangi angka jolma na adong di humaliangta. Molo naeng tarida sinondang ni sada palito, tontu ingkon peakhonon do di inganan na guminjang. Lapatanna, molo naeng tarida sinondangta, ingkon maringan di ginjang, tumimbo ma kualitas ni ngolunta martimbanghon na asing. Asa patut gabe sitiruon tu angka jolma na asing. I do umbahen digombarhon molo palito ingkon maringan di inganan na guminjang, asa boi manondangi humaliangna, asa tiur angka na holom i.
Haholomon na masa di parngoluon ni bangso Israel, uju di habuangan Babel i, ubaon ni Debata ma gabe hatiuron. Haholomon ni ngolu hinorhon ni ragam ni haberniton/ penindasan na nialaman ni bangso i paluaonNa gabe songon bintang na sai marsinondang di borngin ni ari. Nang pe sipata ingkon aeon ni bangso i sangombas songon upa ni dosa nasida gabe mangae na bernit, alai molo holong ni Tuhan i sai torus do paihutihut nasida. I ma marhite haluaon sian rante ni sibolis i, gabe jolma na merdeka jala hehe sian hadabuan na bagas, dipaune Tuhan i tu dengganna parngoluon nasida, gabe "bintang" na sai marsinondang, pasisihon haholomon i.
Molo saleleng na tarbuang i nasida, ndang adong nanggo sada bangso na pasangaphon nasida ala ni leana parngoluon nasida. Alai dung patar sinondang ni Tuhan i di nasida gabe torop bangso mandapothon nasida. Suang songon i ma nang angka raja di portibi mandapothon nasida. Di sada sisi boi do tarida hasasaut ni hata panurirang Jesaya on molo taida hamajuon ni bangso Israel na parpudi on. Sistem pertahanan dohot keamanan ni negara na tercanggih adong di nasida. Sistem teknologi pertanian na canggih na boi manguba tano tungil, tano bangkalbangkal gabe inganan hatubuan nibragam ni suansuanan na produktif. Sian i boi nasida mangeksport angka buah-buahan, sayur-sayuran tu manca negara. Nang pe di sisi na asing hagogok ni hata panurirang on martudutudu tu Kristus, Mesias naung pinarbaga i. Dung patar sinondang ni Kristus, na gabe taruli saluhut bangso dohot harajaon na adong di portibi on gabe siihuthon Kristus.
Turpuk on boi dohonon marisihon panghirimon di Mesias na mamboan haimbaruon/pemulihan ni ngolu ni bangso naung sanga mago i. Patar do i tarida dihamumulak ni bangso i sian habuangan Babel mandapothon tano ni ompu nasida, na gabe bona pasogit nasida. Mulak nasida tu bona pasogit, paulion nasida ma angka huta, porlakna naung sanga sega i, lumobi ma pangalaho nasida gabe marhaimbaruon. Pangalaho na boi mambahen sonang roha ni Debata tu nasida.
Di na pauliulihon sude angka naung sanga sega i, saluhutna mardalan di toru ni sinondang na sian Tuhan i. Molo tapamanat di ayat 47 ndang holan manggombarhon hamumulak ni bangso i sian habuangan i, alai lobi sian i gabe marrongoman mandapothon nasida angka bangso na asing tu Jerusalem/ Sion. Sian huta Sion on ma patar idaon ni angka bangso hatiuron nang hamuliaon ni Debata marhite hinauli, hinadenggan ni huta Sion nang pangisina. Huta na maduma, sonang sohariboriboan saluhut pangisina ditumpak Debata. Saut do angka naung binagabagahon ni Debata gabe bangso na tarpasupasu nasida mangingani tano parpadanan i.
Gabe tangkas ma tarida saluhutna proses pemulihan/ Debata na pauliulihon bangso i di na turun tu nasida hamoraon ni luat nang hinagok ni angka parbegu ro tu nasida. Isarani angka unto, hoda parhuli, angka sere dohot daupa suang songon i angka parhobas na marhobas laho paturehon huta Jerusalem/ Sion gabe huta na mansai uli. Tung marbalik do kondisi ni huta i sian na sego gabe huta na uli, na mora jala gok pasupasu. Molo idaonta Israel si saonari, boi dohonon saut do manjadi na sinuriranghon si Jesaya on. Alai dang apala i dope hagogok ni hata bagabaga i, Jerusalem na imbaru songon Jamita ni Tuhan Jesus do anggo unok ni hata panurirangon di Padan na Robi. Tung i do na gabe sambulo ni tondi ni angka na porsea di Tuhan i.
Kesimpulan dan Refleksi
Turpuk on pangoluhon panghirimon di balga ni huaso ni Debata laho paulihon naung sega i (pemulihan ni Debata maradophon bangsoNa). Sian pengalaman ni ngolu ni bangso i naung pinalua ni Debata sian habuangan Babel gabe paingothon hita, paboa ndang adong na boi manundati, mangambati tahi ni Debata. Lumobi tahi na laho pauliulihon bangsona hinorhon ni sitaonon bolon na songgop tu parngoluonna. Songon i ma nang panghirimonta di ngolunta si nuaeng on. Marhuaso do Tuhan i laho manguba ngolunta na paet i gabe tonggi, na holom i gabe tiur, na so marlapatan i gabe marlapatan tu humaliangta, asal ma sai rade hita manjanghon tanganNa na gok huaso i, laho manguba hita tu parngoluon na dumenggan.
Di Minggu Advent na Paopathon on dipangido asa hehe jala marsinondang hita. Memang molo borhat sian hadirionta sandiri tung na so tolap do hita. Diboto Tuhan i do i, i do umbahen sai dipanghulingi hita marhite hataNa. I do na margogoihon hita asa boi hehe sian hatarpodoman ni ngolunta na sai laon. Hatarpodomon i, isara ni pandelean, halosohon, hamalason jala roha diri. Ingkon tadinghononta do i lumobi ma di na manomunomu haroro ni Sondang na sintong i, i ma Tuhan Jesus na naeng pestahononta ari parningotan hatutubuNa, marhite pesta Natal.
Laos sai mangolu ma sinondang naung sahat di ngolunta on. Sumisi ma angka ragam ni haholomon i. Haholomon isara ni ngolunta na sai diihoti haportibion, na sai tartait dope mangulahon sangkapsangkap ni roha na digohi sibolis i. Diigil Tuhan i sian hita asa manongtong marsinondang hita manondangi hagolapon na sai mian dope di humaliangta. Ingkon talu bahenonta sude haholomon i mardonganhon Debata. Antong sai tajanghon ma Sondang hatiuron na sian Tuhan i, asa hot marsinondang hita. Amen.
[Editor: Hadi Kurniawan]
